العاب الايباد

الجميع يعلم ان الايباد اضاف بعد جديد للالعاب بشكل عام، الشاشة الكبيرة، الدقة العاليه، تعدد اللمسات في الشاشة كلها ساعدت ان الالعاب على الايباد تكون شي مختلف تماماً. واليوم بعد ماكمل الايباد قرابة الشهر معي بقدم لكم قائمه بافضل الالعاب برأي وبحكم تجربتي لها. للأسف الى الان ماوجدت اللعبه اللي ممكن اقول انه استغلت قدرة الايباد بشكل كامل، ولا حتى بشكل قريب. الالعاب اللي بعرضها عليكم اليوم هي اما العاب طورت من نسخة الايفون للايباد ببعض التغييرات او انها العاب كلاسيكية قدمت بشكل جديد للايباد. الالعاب وطرحها في هل التدوينة ماراح يكون بالترتيب ولا بالافضلية ( عشوائي:))

(للحصول على اي من البرامج يرجى الضغط على شعار اللعبه)

Fieldrunners HD

لعبة فيلد رانرز من الالعاب اللي اتوقع انه مافيه احد يحب العاب الايفون ماجربها، من احسن الالعاب اللي ممكن تضيع وقت فيها، الهدف من اللعبه بسيط، هي لعبة ابراج دفاع تحطها على اساس الملاقيف الي يطلعون من اليسار مايوصلون لليمين ( او باللغه العربيه لحماية مقرك الرئيسي من الغزاة باستخدام اسلحة مختلفة)، اللعبة كانت ممتعة جداً على الايفون وفي الايباد ممتعة اكثر مع اضافات بسيطة اهمها هو الرسومات عالية الدقة في اللعبة واضافة مرحلتين (او مرحلة ماني متأكد المهم خمس مراحل بالاخير)، الاسلحة نفسها مع اضافة سلاح واحد عن اصدار الايفون السابق في وحدة من المراحل الجديده يطلع صوت بزززز… رهيب العيب الوحيد في اللعبه هو انك ملزم بالصوت من اللعبه او بدون صوت ( ماتقدر تستخدم صوتياتك الخاصة) Fieldrunners من الالعاب الي انصح بشدة اي شخص يشتري ايباد يشتريها

RealRacing HD

صعبة على اي شخص كان (حتى لو مايحب السيارات مثلي) ان يكتب قائمة بأفضل الالعاب على اي جهاز بدون مايكون فيها لعبة سيارات، على الايفون العاب السيارات كانت موجودة بشكل كبير على اساس دوران الجهاز نفسه، لكن الي ربي بلاه بأصابع كبيره تروح نص الشاشه على دعست البنزين او الفرامل، بالايباد الوضع احلى، الشاشة كبيرة، مسكت الجهاز تحس انك ماسك شي قريب من مقود السيارة، الرسوم في اللعبه ممتازه ، التحكم جداً مريح،الرسومات جميلة جدا. فضلت اللعبه هذي على منافستها Asphalt 5 HD على الرغم من انها اغلى ، بس للي يحبون السيارات تستاهل قيمتها.

Minigore HD

بكل بساطة اللعبه طريقتها انك تحرك اصبعك اليمين لتحرك الشخصية واليسار للدوران وبيطلع لك سته وستين الف شئ لهم شعر كثير ومهمتك تقتلهم، تدور حواليهم وتقتلهم وتجمع منهم الاشياء اللي تطيح سواء اسلحة اضافية او ورد اخضر، علي قد ماتقتل تاخذ نقاط وبعدين ممكن تستبدل النقاط بشخصيات جديدة، طبعاً كل شخصية لها مميزاتها اما سريع او قوي او ردة الفعل طويلة. ما ادري هل انا مافهمت للعبه صح الى الان!! او ان اللعبه مافيها مراحل كثيره لانه الى الان مافيه غير مرحلتين!!

Flight Ctrl HD

من العاب الايفون الي طورت للايباد، الفكرة من اللعبة بسيط جدا، طيارات تطير في الجو والمطلوب هو انك ترسم لها مسار للمدرج المناسب، اللعبه ممتعه جدا وفيها تحدي جميل، الرسومات بسيطه وتعلم اللعبه سهل جدا، فيها مجموعه خرائط جميلة تختلف بالحجم والصعوبه، فيها خريطه 3D صراحة ماعرفت استخدمها(جربت نظرات السينما حقت 3D مانفعت!!)

Angry Birds

لعبة غنية عن التعريف، مميزه في كل شئ ، الرسومات الاصوات المراحل والتصميم بشكل عام مضحك وويوسع الصدر، اللعبه موجوده على الايفون لكن حجم الشاشة صنع فرق كبير بينهم. الحلو في اللعبه انه مراحلها كثيره، بسهوله انك تفوز بالمرحله بس الصعوبه في انك تحصل على الثلاث نجوم الكامله للمرحله. الفكره من اللعبه بسيطه، ترمي عصافير على خنازير:)، وطبعا فيه انواع عصافير، فيها اللي يبيض قنابل، وبعضها انتحاري وبعضها يتحول لثلاث عصافير صغيره. Angry Birds لعبه لازم تكون موجودة على اي ايباد للمتعه .

Broken Sword HD

من الالعاب الكلاسيكية اللي تم تحويلها على الايباد، طرحت اللعبه للمرة الاولي في عام 1996، النسخه هذي تعتبر مطورة باضافة بعض المشاهد والرسومات الجديده. لعبة الغاز بحته من النوع اللي ضروري انه تلعبها بتسلسل ولا ماراح تفهم شي. اللعبه تتطلب لغة انجليزيه وطولت بال. الفكرة من اللعبه هي البحث في قضية قتل حصلت في فرنسا ويقوم بالبحث سائح امريكي وصحفية فرنسية، الالغاز رائعه وفيها تحدي بعضها سهل وبعضها صعب بزيادة مبالغ فيها، المؤثرات والصوت متواضعه الى حد ما لكن لا ننسى ان اللعبه كلاسيكيه قديمه .

Suduko HD

لعبة سودوكو من الالعاب اللي موجوده في كل مكان على كل جهاز وفي كل جريدة او مجلة حوالينا، لعبه ذكاء وارقام وابسط تعريف لها انها كلمات متقاطعه بالارقام، نسخة الايباد اعجبتني لعدة اسباب، اول شي انه ممكن تصنع السودوكو الخاصة فيك، الرسومات والتحكم والخصائص سهله وواضحة، واهم شي ان الصعب مستحيل والسهل خفيف يعني متوازنه اللعبه

Red Alert

مدري وش فيني مع الالعاب الكلاسيكيه ولكن هل اللعبه من اهمهم، كوماند اند كونكر ريد اليرت من اجمل العاب الستراتيجي في التاريخ برأي، نسخه الايباد مشابه للنسخة الاصليه، الرسومات جميلة، التحكم سهل والتعامل مع الوحدات يحتاج بعض الممارسه، المشكلة الوحيده في اللعبه ان كل صعوبات اللعبه سهله، يعني من شبه المستحيل انك تنهزم !! وهذا افقد اللعبه جزء كبير من هيبتها عندي

Prince of Persia

اول لعبه لعبها في حياتي يمكن ، اللعبه هذي هي تطوير من الاصدار الاول في عام 1989، طبعاً من بعد الاصدار الاول وجد اكثر من اصدار على اكثر من جهاز انتهاء باصدار 2010 على البلايستيشن والنيتندو ويي واخيرا اصدار الفيلم الخاص باللعبه من ديزني. هذا مايميز اللعبه (تاريخها!!) الرسومات مثل الاصدار الاول، التحكم صعب للغايه ويميل للسيء، بس اللي يحب ذكريات الطفوله لازم يجربها.

Parcel Panic

لعبة سيارات بطريقه جديده بعض الشي، سباق مع الزمن، الهدف من اللعبه انه معاك سياره بك اب (ونيت، ددسن ,Pickup) والهدف انك تحمل صناديق وتوصلها، التحكم جميل ومتعه اللعبه في اختصار الطرق والطيران . عيب كبير في اللعبه هو صغر مساحة اللعبه ( الخريطه).

في النهاية. مازلت انتظر لعبة كرة قدم تستاهل ولعبة مغامرات مميزه. كثير من الالعاب جربتها ولا انصح فيها مثل Iron man 2, Pinball HD, Tetris,HotelMogul , Tiki Towers كما انه هناك مجموعه العاب مقبوله لكن ما تستاهل الذكر مقارنه بالمذكور برأيي  Radiation , TicTacFree,Babo Crash بالأخير هذا رأي شخصي واللي عنده العاب احلى ياليت يدلني عليها.

ريان الوابل